Supremja rrëzon ankesën e Kurteshit dhe Krasniqit kundër certifikimit të kandidatëve të Listës Serbe
Gjykata Supreme e Kosovës ka hedhur poshtë ankesën e Sami Kurteshit dhe Alban Krasniqit, të cilët kishin kundërshtuar vendimin e Panelit Zgjedhor për Ankesa dhe Parashtresa (PZAP) për certifikimin e kandidatëve të Listës Serbe në zgjedhjet lokale.
Në vendim thuhet se ankesa e dy anëtarëve të Komisionit Qendror të Zgjedhjeve është e palejuar, pasi ligji nuk parashikon që një anëtar individual i KQZ-së të ketë të drejtë të ankimojë personalisht në Gjykatën Supreme ndaj vendimeve të institucioneve ku vetë bën pjesë.
“Meqenëse nuk ka asnjë bazë ligjore që i jep të drejtë një anëtari të KQZ-së të jetë palë në procedurë gjyqësore për vendimet e këtij institucioni, Gjykata Supreme konstatoi se ankesa e parashtruar është e palejuar. Për këtë arsye, kolegji nuk është lëshuar në shqyrtimin meritor të çështjes”, thuhet në arsyetim.
Vendimi i Supremes nënkupton se certifikimi i kandidatëve të Listës Serbe nga PZAP mbetet në fuqi.
